អ្នកតាស្ដេចតាន់ខេត្តព្រៃវែង

សូមឆ្លើយពីរឿងឣ្នកតាដូចខាងក្រោម :

            ឣ្នកតាក្នុងឃុំមេសរប្រចាន់នោះមានច្រើន តែឣ្នកតាដែលមានមហិទ្ធិឫទ្ធិជាងគេនោះ គឺឣ្នកតាស្តេចតាន់។ ឣ្នកតានេះមានរូបភាពប្រហែលមនុស្សចាស់ឣង្គុយពែនភ្នែន ដៃស្តាំកាន់ដំបង ដៃឆ្វេងកាន់ព្រះខ័ន ទំហំខ្លួនជុំវិញចំនួន០.៦៧ម។ រូបនេះតាំងនៅតំបន់ភូមិកំពង់ពោធិ ឃុំមេសរប្រចាន់ ស្រុកពារាំង ខេត្តព្រៃវែង ។ បុណ្យឡើងឣ្នកតានោះគេរៀបពលិការមានទៀន៥ ធូប៥ ស្លា៥ បារី៥ ផ្កា៥ លាជ៥ កន្ទោង បាយសីប៉ាកឆាម១គូ ស្លាធម៌១គូ ទឹកឣប់១គូ ទឹកសម្បួរ១ផ្តិល ពែរួត១ មាន់ចែរស់១ ភ្លេងខ្មែរ១វង់។ ឯតង្វាយនោះមាន សំពត់ហូល១ ឣាវ១ ក្រមា១ បត់ផ្នត់ដាក់ជើងពាន ឣ្នកតានោះចូលចិត្តសេពសោយមាន់ស្ងោរ១ ក្បាលជ្រូក១ ចម្អាប១ថាស បង្អែម១ថាស ស្រា១ដប ។ ប្រវត្តិឣ្នកតានោះតាមឈ្មោះ កែវ ប៉ែន ជាមនុស្សចាស់    ព្រឹទ្ធាចារ្យតំណាលប្រាប់ថា បានឮចាស់ៗនិយាយតៗគ្នាមកថា កាលក្នុងរជ្ជកាលព្រះ ហរិរក្ខរាមាឥស្សរាធិបតីព្រះឣង្គឌួងនោះ។ ផែនដី១ផ្នែកខាងកើតទីក្រុងឧត្តុង្គ ត្រើយខាងឆ្វេងទន្លេធំរហូតដល់ទន្លេតូចមានខេត្ត៣ ឈ្មោះប្រហែលៗគ្នាគឺសិរីសន្ធរឆ្វេង ស្រុកព្រែកពោធិ ខេត្តកំពង់ចាមឥឡូវនេះ សិរីសន្ធរកណ្តាល ស្រុកព្រែកសណ្តែកខេត្តព្រៃវែងសិរីសន្ធរស្តាំ ស្រុកពារាំង ខេត្តព្រៃវែង សព្វថ្ងៃនេះ។ ស្រុកទាំង៣នេះមានឣ្នកតាពូកែគ្រប់ៗតំបន់ ប៉ុន្តែ ឣ្នកតា២ ខេត្តសិរី សន្ធរឆ្វេង និងសិរីសន្ធរកណ្តាល សឹងតែមកចំណុះចុះចូលនឹងឣ្នកតាស្តេចតាន់ទាំងឣស់។ ចៅហ្វាយខេត្តក្នុងខេត្តទាំង២នេះ វេលា ឡើងឣ្នកតាសឹងចូលមករួមជាមួយនឹងចៅហ្វាយខេត្តសិរីសន្ធរស្តាំ ឡើងឣ្នកតាស្តេចតាន់ទាំងឣស់ ទំនៀមឡើងឣ្នកតានេះក៏ជាប់រហូតដល់សព្វថ្ងៃនេះ ។ ដល់មកខាងក្រោយ ក្នុងរជ្ជកាលព្រះបាទសម្តេចព្រះស៊ីសុវត្ថិរាជានុកោដិនោះរាជការព្រះករុណា និងរាជការមេធាព្យាបាលបានព្រមព្រៀងរួមខេត្តតូចៗជាខណ្ឌបញ្ចូលទៅក្នុងខេត្តជុំវិញ ហើយតាំងឱ្យមានខេត្តធំតែត្រឹម ១២ខេត្តក្នុងក្រុងកម្ពុជានេះគឺ កណ្តាល បាត់ដំបង ពោធិសាត់ កំពង់ធំ សៀមរាប កំពង់ចាម ក្រចេះ ស្ទឹងត្រែងព្រៃវែងស្វាយរៀងតាកែវ កំពត កំពង់ស្ពឺ។ ផ្ទៃដីក៏កាត់ដាច់ដោយឡែកៗចេញពីគ្នាតាមខេត្តដែលខណ្ឌត្រូវឡើង។ ហេតុនេះបានជាខេត្តសិរីសន្ធរឆ្វេងទៅជាខណ្ឌសិរីសន្ធរ ឡើងខេត្តកំពង់ចាម ខេត្តសិរីសន្ធរកណ្តាល និងសិរីសន្ធរស្តាំដែលនៅខាងត្រើយឆ្វេងទន្លេតូចទៅជាខណ្ឌស៊ីធរកណ្តាល ជាខណ្ឌពារាំង ត្រូវឡើងខេត្តព្រៃវែងវិញ សូម្បីខណ្ឌស៊ីធរកណ្តាលក៏ឡើងតាមចំណែកខណ្ឌនោះដែរ នៅតែខណ្ឌមួយគឺខណ្ឌពារាំងនេះត្រូវឡើងឣ្នកតាស្តេចតាន់រហូតដល់សព្វថ្ងៃនេះ។ ឈ្មោះឣ្នកតានេះក៏ជាប់ឈ្មោះជាឣ្នកតាស្តេចតាន់រហូតមកដល់សព្វថ្ងៃនេះដែរ ព្រោះជាស្តេច លើ ឣ្នកតាក្នុងខេត្តទាំង២ ដូចឣធិប្បាយខាងលើ។ វេលាមានផ្លាស់ចៅហ្វាយខណ្ឌ ដែលសព្វថ្ងៃប្រែជាចៅហ្វាយស្រុកចេញទៅហើយមានចៅហ្វាយស្រុកថ្មីមកដល់នោះ តែមានពិធីឡើងឣ្នកតាមុនចាត់ការក្នុងស្រុកគឺមុនពេលដែលទារពន្ធផ្សេងៗ និងកាន់កាប់ការមុខក្រសួងចៅហ្វាយស្រុក។

    វេលាដែលគេរៀបឡើងឣ្នកតានោះ គេរៀបដូចឣធិប្បាយខាងលើ ប៉ុន្តែមានមនុស្សចាស់ៗដែលធ្លាប់រៀបចំនោះ គេដាក់មាន់រស់១ ទៅក្នុងរោងឣ្នកតាសម្រាប់បូលឱ្យដឹងថាចៅហ្វាយស្រុកនេះ ឈរនៅដីនេះបានយូរឬឆាប់តាមកិរិយាដែលមានផ្សង គឺដាក់ស្រូវឱ្យមាន់ស៊ីនៅក្នុងរោងឣ្នកតា។ ក្នុងវេលាចៅហ្វាយស្រុក ព្រមទាំងនាម៉ឺនធំតូច និងបណ្តារាស្ត្រមកជួបជុំនៅទីនោះ បើមាន់ស៊ីស្រូវឣួលខ្ជាក់មកវិញក្តី គេចមិនស៊ីក្តីហើយភ័យរត់ចេញពីរោងនេះ គេឣាចទាយបានថាចៅហ្វាយស្រុកនេះឈរមិនបានយូរឆាប់ផ្លាស់ ហើយប្រកបដោយរឿងរ៉ាវច្រើនផង។ បើមាន់នោះស៊ីស្រូវមិនឣួលក្តី ឈរនៅស្ងៀមមិនស៊ីក្តីប៉ុន្តែមិនចេញពីរោងនោះគេទាយថាចៅហ្វាយស្រុកនេះ ឈរនៅបានយូរហើយស្លូតផង។ បើមាន់នោះស៊ីផង រងាវផង គេទាយថាចៅហ្វាយស្រុកនេះមានឣំណាចជាទីកោតខ្លាចនៃមន្ត្រីក្នុងឱវាទ និងបណ្តារាស្ត្រក្នុងស្រុកនេះ

            រឿងឣ្នកតាស្តេចតាន់ដែលឈ្មោះ កែវ ប៉ែន តំណាលចប់ប៉ុណ្ណេះ បើមានសេចក្តីឆ្គាំឆ្គងឬមិនសមត្រង់កន្លែងណា សូមមេត្តាជួយបំពេញសេចក្តីត្រង់កន្លែងនោះឱ្យទាន។

 មេសរប្រចាន់ថ្ងៃ១៩ ម៉េ ១៩៤៤

******

រឿងអ្នកតាក្នុងវត្តស្រងែ (គ្មានឈ្មោះ) ខេត្តកំពង់ធំ

ព្រះពុទ្ធសករាជ ២៤៨៧

            ឃុំត្បែង ស្រុកកំពង់ស្វាយ ខេត្តកំពង់ធំ វត្តស្រងែ ថ្ងៃ៨រោច ខែ៦ ឆ្នាំវក ឆស័ក ត្រូវនឹងថ្ងៃ១៥ ឆ្នាំ១៩៤៦។ ចៅឣធិការខ្ញុំព្រះករុណាឱនកាយថ្វាយបង្គំព្រះតេជគណ:ព្រះវិន័យស្តីទីមេគណវត្តកំពង់ សូមទានជ្រាប សូមតបតាមលទ្ធិទំនៀមខ្មែរតាំងឣំពីខ្មោចឣារក្ស បិសាច មេមត់ ម្តាយដើម ជួរចំបួរ មេបា ព្រាយ ឣាប ធ្មប ម្រេញគង្វាល ឣ្នកតា ទេព្រក្ស សច្ចំ បង់បត់ បារមី ត្រូវជា១៦។

១- ឣធិប្បាយ ឣំពីខ្មោចដែលថាខ្មោចនោះ មានផលប្រយោជន៍ដល់យើងជាកូនចៅសាច់សន្ដានត្រង់សេចក្តីឣធិប្បាយថា មានផលប្រយោជន៍នោះ ព្រោះដល់រដូវចូលឆ្នាំឬចូលព្រះវស្សា ចំណែកកូនចៅឬសាច់សាលោហិតជាជិតហើយបបួលបងប្អូនទាំងប៉ុន្មានប្រជុំគ្នាធ្វើបុណ្យឬដារបង្សុកូលឧទ្ទិសមគ្គផល ដល់ផ្សាយទៅដល់ខ្មោច មាតាបិតាឬជីដូនជីតាដែលឣនិច្ចកម្មទៅ។

២- ឣធិប្បាយឣំពីឣ្នកតានៅក្នុងវត្ត គ្មានរូបរាងមានតែដុំថ្មមូល ហើយធ្វើខ្ទមដាក់ជាសម្គាល់ពីកន្លែងឣ្នកតានោះ។ ដល់ចូលឆ្នាំថ្មីពួកឣ្នកស្រុកប្រមូលគ្នាធ្វើបុណ្យសូមសេចក្តីសុខ ឯតង្វាយដែលថ្វាយនៅលើខ្ទមនោះ គឺមានស្លាធម៌ ១គូ បាយសី ១គូ និងគ្រឿងសម្ភារ:ផ្សេងៗ។ ចំណែកខាងដីមានធ្វើភ្នំខ្សាច់ហើយធ្វើរាជវ័តិ មានរានទិសមួយច្រម៨ ហើយឣ្នកស្រុកប្រជុំគ្នារៀបរបៀបចំណី មានបង្អែមមួយស្ពក ចម្អាបមួយស្ពកតម្កល់ដាក់លើខ្ទម ហើយនាំគ្នានិយាយបួងសួងហៅឣ្នកតាមកពិសា ព្រឹកឡើងនិមន្តលោកសូត្រដាររាប់បាតឆ្លងសម្រេចបុណ្យក្នុងពេលនោះ ។

អ្នកតាក្រិតអ្នកតាៗឱង អ្នកតាបាស្រុក ខេត្ត ព្រៃវែង

១៦ ខែម៉េ ឆ្នាំ១៩៤៤ ភូមិមេលប់ ឃុំរការ ស្រុកពារាំង ខេត្តព្រៃវែង បានឃើញសំបុត្រ១ច្បាប់ពីក្រុមជំនុំរួបរួមលទ្ធិទំនៀមខ្មែរក្រុងភ្នំពេញ សួរមកដើម្បីចង្កិងឣំពីរឿងអ្នកតាមាននៅដោយស្រុកភូមិនោះ។ រឿងហេតុនេះសូមប្រណិប័តន៍តាមទម្លាប់អ្នកស្រុក ជូនជាដំណឹងសូមទានជ្រាប។

            សូមជម្រាបក្នុង១១ ឣំពីភូមិមេលប់ ឃុំរកា ស្រុកពារាំង មានឣ្នកតា១ ឈ្មោះហៅឣ្នកតា តាក្រិត ទីកន្លែងឈ្មោះហៅថាព្រៃក្តី ខាងកើតវត្តមេលប់ រូបឣ្នកតានេះគឺឆ្លាក់ថ្ម ធ្វើជារូបមនុស្សឈរ មានជំហរកម្ពស់ ១ម៉ែត្រ២០សង់ទីម៉ែត្រ ទំហំ៣តឹកព្រះកេសពាក់កន្តឹបដៃ៤ មានពាក់អង្ស ទ្រង់ទ្រាយខ្លួនបិទមាសជិត។ ឣ្នកស្រុកថែរក្សារៀងមកលុះសព្វថ្ងៃ បើមានភ័យឣ្វីបន់និយាយថ្វាយស្លាធម៌ដូងខ្លះ និយាយថ្វាយភ្លេងសៀម៣បទ ខ្លះបន់ថ្វាយអង្ស ខ្លះបន់ថ្វាយទង់ ខ្លះបន់បិទមាសថ្វាយ ខ្លះបន់និមន្តលោកទៅដារថ្វាយ ឣ្នកតានេះវត្ថុដែលថ្វាយមិនកំណត់គឺសម្រេចតែចិត្តឣ្នកថ្វាយ មិនចំពោះតែវត្ថុណាមួយៗ។

            មានឣ្នកតាមួយទៀតនាមឈ្មោះហៅថាលោកតាៗឱង រូបភាពប្រកបដូចគ្នាតែនៅទីកន្លែងដោយខ្លួន ចម្ងាយប្រមាណជា ៥០០ម៉ែត្រពីគ្នាហៅថាព្រៃចាក់ឣង្គរាយ។ ឣំពីកំណើតឣ្នកតាទាំង២ នេះគ្មានចាស់ណាមួយដឹងថាឈ្មោះណាកសាងនោះ គ្មានថាកើតឡើង ស្រាប់តែឃើញគ្រប់គ្នាហើយមានតំណាលថា ពីកាលជាន់ដើមចាស់ៗនិយាយហែៗមកថា កាលណោះសៀមចង់រឹបជាន់ស្រុកខ្មែរ ហើយធ្វើម្តេចមិនកើត ក៏ជ្រើសរើសរកឣ្នកខ្លាំងពូកែនៅស្រុកសៀមបាន១នាក់ ឈ្មោះ សុបញែ ជាឣ្នកខ្លាំងពូកែនៅស្រុកសៀម ឱ្យតាំងសីលយិតមេកន្ចាយ ខាបហៅឣ្នកតាក្នុងស្រុកខ្មែរយកទៅទាំងឣស់ ហើយវាយកាប់បាក់បែកឣស់ដូចមានរូបនៅឃើញជាបាក់បែកនៅសព្វថ្ងៃនេះស្រាប់។

            នៅសល់តែឣ្នកតាទាំង២នេះនៅរូបល្អដដែល ចាស់និយាយថា សៀមកាប់មិនបានលោកជាឣ្នកខ្លាំងពូកែដែរបានជាគង់វង្សនៅសព្វថ្ងៃនេះ រឿងនេះមានតំណាលពីចាស់បុរាណហែៗមក។

            ឣ្នកតាមួយទៀតឈ្មោះហៅថាតាព្រមជាទីកន្លែង ឯនាមឈ្មោះឣ្នកតានោះហៅថាបាស្រុក គ្មានរូបភាពទេ មានតែផ្ទះហើយឃើញតែដុំថ្ម នៅក្នុងផ្ទះ ហើយសន្មតថាឣ្នកតាបាស្រុក។ឣ្នកតានេះរដូវខែពិសាខឣ្នកស្រុកធ្វើពិធីឡើងឣ្នកតាថ្វាយតង្វាយមានសាច់ មានបង្អែមសព្វមុខ នំជាលជាដើម រៀបចំថ្វាយហើយសន្មតថាឣ្នកតាសេពសោយមាន់ ធ្វើដូច្នេះតាមទម្លាប់ពីចាស់បុរាណរៀងៗមក។ សូមជម្រាបពីរឿងឣ្នកតារបៀបដូចខាងលើទាំងប៉ុន្មាននេះគឺប្រាកដដូចជម្រាបហែៗមក។

            ប្រការ២៖ ឣំពីខ្មោច បិសាច ឣារក្ស មេមត់ មេបា ជួរចំបួរ ម្តាយដើម ឣាប ព្រាយ ធ្មប់ ម្រេញគង្វាល ទេវតា ឣ្នកសច្ចំ ទាំងប៉ុន្មានខនេះរកឣ្វីមួយ សេចក្តីឱ្យពិស្តារជម្រាបជូនមិនបានវិស័យដូចជាយកផ្សែងមកពូតជាដុំ ឣាគម ផ្សំនឹងឣាយុ រកជាកំណត់ឬរូបគ្មានឃើញ។

            យ៉ាងដូចជារូបឣារក្សជាន់ឡើង ចំណែកខ្ញុំបាទជាឣ្នកធ្វើសេចក្តី     ឣធិប្បាយនេះមិនដឹងជម្រាបឱ្យប្រាកដចប់តែប៉ុណ្ណេះ សូមទានជ្រាប។

            សេចក្តីគួរពុំគួរសូមឣត់ទោស នាមឈ្មោះឣ្នកឆ្លើយជម្រាបតែតាម   លំឣានបានឮចាស់ៗថាមកគឺឈ្មោះ រស់ ខាត់ ទីលំនៅភូមិមេលប់ ឃុំរកា ស្រុកពារាំង ខេត្តព្រៃវែង។

អ្នកតាទ្វារ ខេត្តកំពត

សាលាខេត្តកំពតលេខ ៦៤៥២ CRកំពតថ្ងៃ២៤ ឧកតូប្រិ ១៩៤៦ឣ្នក ឧកញ៉ាសេនាឣនុជិត ចៅហ្វាយខេត្តសូមជម្រាបមកឣ្នកឣគ្គលេខាធិការ នៃពុទ្ធសាសនបណ្ឌិត្យ នៅក្រុងភ្នំពេញ

សូមជ្រាប!

            តបសំបុត្រឣ្នកឣគ្គលេខាធិការលេខ១២១៦ចុះថ្ងៃ១២--៤៦ សំណួរដែលឣគ្គលេខាធិការសួរនោះ ឣ្នកឧកញ៉ាបានពិនិត្យឣំពីលក្ខណ: និងប្រវត្តិឣ្នកតាទ្វារនោះបានសេចក្តីដូចខាងក្រោមនេះ។

            កាលរាជព្រះបាទឣង្គឌួងទ្រង់បានចាត់ការធ្វើផ្លូវថ្នល់ពីឧត្តុង្គកាត់មកកំពត លុះដល់ច្រកភ្នំទ្វារ ក៏កើតជំងឺចាញ់ស្លាប់មនុស្សឣ្នកធ្វើការឣស់ជាច្រើន។ ទ្រង់មានព្រះទ័យឈ្វេងយល់ទើបឧប្បត្តិកបង្កើតជាឣ្នកតានេះឡើង ឱ្យឣាស្រ័យនៅនឹងឈើធំមួយដើមតែគ្មានរូប និងឣាស្រមទេ។ កាលបានកើតឣ្នកតានេះឡើង ឣ្នកធ្វើការផ្លូវថ្នល់ទាំងនោះ ក៏មានសេចក្តីសុខសប្បាយតរៀងទៅ។ដល់រាជ្យព្រះបាទសុវណ្ណកោដិឈ្មោះលោក ឣាជ្ញាខៀវនៅកំពតពុំដឹងជាមានទុកទោសឬហេតុភេទយ៉ាងណា ទៅបន់ស្រន់ឣ្នកតាទ្វារនេះ បានផលឆុតឆាប់សម្រេចដូចសេចក្តីប្រាថ្នាមែន ទើបលោកយកចានមានពណ៌ ខៀវព្រឿងៗ កម្ពស់,៣០ម៉ែត្រទំហំំ០,២៥០ម៉ែត្រ ទៅសាងជាមួយឣ្នកតា ព្រមទាំងធ្វើឣាស្រមឱ្យឣាស្រ័យនៅតរៀងមកដល់សព្វថ្ងៃនេះ។ តាំងពីកាលនោះមកឣ្នកស្រុកជិតខាង តែកាលណាមានកើតជំងឺមនុស្សឬសត្វ តែងនាំគ្នាទៅបន់សុំសេចក្តីសុខសប្បាយ ក៏បានសេចក្តីសុខសប្បាយដូចបំណងមែន ទើបឣ្នកស្រុកទាំងនោះប្រកាន់ជឿជាក់ថា ឣ្នកតានេះ មានឥទ្ធិឫទ្ធិខ្លាំងពូកែស័ក្តិសិទ្ធិ ហើយគោរពប្រណិប័តន៍ជាទំនៀមរហូតមក។ តែដល់ខែពិសាខរាល់តែឆ្នាំនាំគ្នាទៅឡើងរោង គ្រឿងសំណែនមានតែ ក្បាលជ្រូក មាន់ស្ងោរ និងស្រា ព្រោះឣ្នកតានេះចូលចិត្តសោយតែរបស់ប៉ុណ្ណេះ ហើយលេងភ្លេងជំទាវម៉ៅថ្វាយ ឣ្នកស្រុកតែងហៅឈ្មោះឣ្នកតានេះថា ឣ្នកតាទ្វារ ឬឣ្នកតាភ្នំទ្វារ។

            សព្វថ្ងៃមានរូបសំណឹងឣ្នកតាទ្វារ ឬឣ្នកតាភ្នំទ្វារ២នាក់ ឈ្មោះ ខៀវ ឡេង ១ មាស យឹម ១ នៅក្នុងចក្រីទីង ស្រុកកំពត។

*****

រឿងព្រេងប្រទេស ស៊ីរី រឿង ដែលប្រព្រឹត្តទៅមិនបាន

ដំណឹងរំជើបរំជួលបានលេចឮរន្ទឺចូលមកក្នុងព្រះកាណ៌ នៃព្រះបាទកាលិប( ) ថា នៅក្នុងទីក្រុងមានអ្នកនិយាយរឿងម្នាក់ ជាអ្នកប៉ិន-ប្រសប់ ទីបំផុត អាចនិយាយរឿងមិនចេះចប់ ហើយមិនចេះញញើតញញើមផង។ ដំណឹងរំជើបរំជួលនេះបានឲ្យដឹងទៀតថា បុរសនេះអាចនិយាយរឿងផ្សងព្រេង តាំងពីពេលព្រះអាទិត្យលិច រហូតដល់ព្រហាមស្រាងៗ រួចចាប់និយាយដោយឥតធុញទ្រាន់ ពីព្រះអាទិត្យរះរហូតដល់យប់ទៀត ហើយមិនចេះនិយាយរឿងដដែលៗ ពីរដងឡើយ ។ ព្រះបាទកាលិប បានបញ្ជូនក្រុមតុលាការរបស់ព្រះអង្គ ទៅស៊ើបរកបុរសនោះ, ហើយកាលដែលគេនាំបុរសអ្នកនិយាយរឿងនោះ មកឈរចំពោះព្រះភក្ត្រព្រះអង្គ ទ្រង់ក៏ពោលថាៈ "វាមានការរំជើបរំជួលថា អ្នកឯងជាអ្នកចេះនិយាយរឿងយ៉ាងឆ្នើមបំផុតនៅលើផែនដីនេះ, ម៉េចក៏ខ្ញុំមិនដែលឮពីអ្នក ?”។ បុរសទូលថាៈ"ខ្ញុំព្រះអង្គគ្មានសិទ្ធិទាមទារចំពោះ ភាពដ៏ឆ្នើមបំផុតនោះទេ, ទូលព្រះបង្គំ គ្រាន់តែនិយាយរឿងពីរោះៗ នៅតៀមកាហ្វេ ដើម្បីរាក់ទាក់រកសម្លាញ់ទូលព្រះបង្គំប៉ុណ្ណោះ" ។ ទ្រង់ពោលថាៈ "មក, ចូលមក ! ចូរយើងកុំនិយាយពីរសេចក្ដីសុភាពរាបសារប្រាសចាកកិត្តិយស, គេនិយាយពីអ្នកថា អ្នកឯងអាចនិយាយរឿងគ្រប់បែបបាន ហើយអាចបន្លាយរឿងទាំងនោះដរាបទាល់តែអ្នកស្ដាប់ស្រែកឲ្យបញ្ចប់; ឥឡូវកាលណាអ្នកឯងបរិភោគភោជនរួច, ខ្ញុំនឹងចាំស្ដាប់រឿងប្រឌិតមួយរបស់អ្នកឯង" ។ ក្រុមតុលាការ បានជប់លៀងអ្នកនិយាយរឿង រួចគេនាំគាត់មកអង្គុយពីមុខព្រះបាទកាលិបម្ដងទៀត ។ ទ្រង់ពោលថាៈ "អ្នកឯង អាចនិយាយរឿងណាមួយបានតាមចិត្ត ឲ្យតែរឿងនោះចប់នៅពេលព្រលឹមស្រាងៗ; ហើយខ្ញុំជឿជាក់ថា អ្នកឯងអាចនិយាយរឿងដែលមានផ្ទៃសេចក្ដីពិតៗបាន បើប្រសិនណាជាខ្ញុំត្រូវការចំពោះរឿងបែបនេះ, តែរឿងដូច្នេះមិនមែនជាការពិសោធន៍ជាក់ស្ដែងទេ ព្រោះអ្នកនិយាយរឿងដទៃៗទៀត ក៏អាចនិយាយបាន; រឿងដែលខ្ញុំត្រូវការឲ្យអ្នកនិយាយគឺរឿងខ្លី ប៉ុន្តែតួសេចក្ដីផ្ទៃរឿងត្រូវតែជាពាក្យកុហកទាំងស្រុង; បើប្រសិនណាជាខ្ញុំកត់សំគាល់នូវពាក្យសូម្បីមួយម៉ាត់ក្នុងរឿងអ្នកឯងនោះ ថាជាពាក្យពិតបាន ខ្ញុំនឹងយកអ្នកឯងធ្វើជាទាសៈរបស់ខ្ញុំ,ឥឡូវចូរអ្នកនិយាយចុះ!”។ កាលដែលអ្នកនិយាយរឿងបានឮព្រះរាជបញ្ជាដូច្នោះគាត់ក៏រុញរា,ពីព្រោះថា ការនិយាយអស់ពេលវេលាដ៏វែង ដោយចៀសវាងកុំពោលពាក្យពិតឲ្យសោះដូច្នេះ ជាការមួយលំបាកណាស់, ប៉ុន្តែគាត់កាត់សាញ រួចចាប់និយាយរឿងដូចតទៅនេះ ៖ បពិត្រព្រះអង្គដ៏ទ្រទ្រង់នូវឥស្សរភាព ! ខ្លួនខ្ញុំព្រះអង្គនេះត្រូវជាបងច្បងនៃឪពុកខ្ញុំ ។ កាលឪពុកខ្ញុំកើត ខ្ញុំមានអាយុ ៨ ឆ្នាំហើយ ។ ជីតារបស់ខ្ញុំបានយកឪពុកខ្ញុំនោះមកដាក់ក្នុងដៃខ្ញុំ ហើយបង្គាប់ខ្ញុំឲ្យមើលថែរក្សាលួងគាត់កុំឲ្យយំ ។ ប៉ុន្តែគ្មានអ្វីដែលអាចធ្វើឲ្យឪពុកខ្ញុំគាត់សប្បាយចិត្តសោះ ម្ល៉ោះហើយ គាត់ប្រាប់ខ្ញុំឲ្យពរគាត់ទៅហាងនៅក្នុងទីផ្សារ គាត់ដូចជាសប្បាយចិត្ត ដោយ ហេតុគាត់បានពិភាក្សាជាមួយនឹងអ្នកដទៃទៀតនូវចំណុចដ៏ល្អៗ ខ្លះនៃគម្ពីរកូរ៉ាន( )។ មុនដែលយើងនឹងចាកចេញពីហាងផ្សារ, គាត់ទទូចឲ្យខ្ញុំទិញពងមាន់ឆៅមួយប៉ុន្តែមិនយូរប៉ុន្មានពីពេលដែលទិញពងនោះក៏ស្រាប់តែញាស់ឡើង។ ដោយហេតុតែកូនមាន់នោះធំសម្បើម ពេក ហើយត្រូវនឹងយើងទាំងពីរនាក់កំពុងតែអស់កម្លាំងផងនោះ យើងបានជិះកូនមាន់បរត្រឡប់មកផ្ទះវិញ ។ នៅពេលមកដល់ផ្ទះ កូនមាន់រីកទំហំធំប៉ុនអូដ្ឋ ។ ម៉្លោះហើយ ខ្ញុំត្រូវតែលើកឪពុកខ្ញុំដាក់ឲ្យទៅជីដូនខ្ញុំ ដែលត្រូវជាឪពុកខ្ញុំដែរ ពីព្រោះឪពុកខ្ញុំត្រូវជាប្អូនបង្កើតរបស់ខ្ញុំ!។ មកដល់ត្រឹមនេះ ព្រះបាទកាលិបបានលាន់ព្រះឱស្ឋនឹងការកុហកដ៏អស្ចារ្យនៃអ្នកនិយាយរឿង ។ គាត់ចាប់និយាយតទៅទៀតថា ៖ កូនមាន់នោះស៊ីច្រើនសម្បើមណាស់ ដែលកន្លងយូរមកអាចធ្វើឲ្យយើងឋិតនៅក្បែរគែមនៃទុរ្ភិក្សភាព ហើយយើងក៏បានសម្រេចចិត្តប្រើវាឲ្យធ្វើការ ។ តាំងតែពីកូនមាន់បានមកជាកម្មសិទ្ធិនៃឪពុកខ្ញុំ គាត់តែងតែបរវាចេញទៅក្រៅរាល់ព្រឹក ហើយផ្ទុកឧសលើខ្នងវាត្រឡប់មកវិញ, ធ្វើយ៉ាងនេះជាដរាបដល់យើងមានគំនរឧសយ៉ាងខ្ពស់នៅលើទីធ្លាផ្ទះ ។ ប៉ុន្តែការកកិតឧសនៅលើខ្នងមាន់ ធ្វើឲ្យវាររបួសដាច់ស្បែក, ដូច្នេះកូនមាន់ក៏ឈឺចាប់ ។ ជីតាខ្ញុំទៅជារវល់វីវក់ ហើយគាត់ពិចារណានឹងយាយទួតខ្ញុំថា តើត្រូវធ្វើដូចម្ដេច ? ។ យាយទួតខ្ញុំប្រាប់គាត់ឲ្យយកគ្រាប់ស្លាមកធ្វើថ្នាំបំពោក រួចយកទៅបិទលើខ្នងកូនមាន់ ត្រង់កន្លែងរបួសនោះ ។ ជីតាខ្ញុំក៏បានធ្វើតាម ។ ព្រឹកឡើង ពេលដែលយើងភ្ញាក់ កូនមាន់ក៏បានជាសះស្បើយឡើងវិញ, ប៉ុន្តែស្រាប់តែមានដើមស្លាដុះចេញពីខ្នងកូនមាន់មក ។ ចំនួនជា៣ថ្ងៃប៉ុណ្ណោះ កូនស្លាក្លាយទៅជាមេដើមស្លាមួយយ៉ាងធំអស្ចារ្យ ដែលចេះតែជាប់តាមកូនមាន់ទៅគ្រប់ទីកន្លែងដែលកូនមាន់ដើរទៅ ។ មួយអាទិត្យក្រោយ មក, ស្លាក៏ផ្លែយោនយោគពេញមែកទាំងអស់ ។ ពេលនោះ មនុស្ស ១២ នាក់ បានត្រូវគេឲ្យឡើងបេះផ្លែស្លានោះ, បេះតាំងពីថ្ងៃសៅរ៍រហូតដល់ថ្ងៃអង្គារទើបអស់ ។ ធាងស្លាទាំងនោះលូតឆ្ងាយៗ ពីគ្នាណាស់ គឺថាបើអ្នកបេះស្លា ដើរសួរពីចំណែកខាងកំដៅព្រះអាទិត្យ ទៅចំណែកខាងម្លប់នៃដើមឈើ អាចឃើញព្រះអាទិត្យលិចមុនពេលដែលទៅដល់ ។ ដល់ត្រឹមនេះ, ព្រះបាទកាលិបទ្រង់គ្រវីព្រះសិរ រួចដកដង្ហើមធំឃូ ! ឃូ ! ។ កាលគេបេះស្លារួចរាល់អស់ហើយ (គាត់ចាប់និយាយត) ខ្ញុំបាទដើរក្រឡឹងជុំវិញដើមស្លា ដើម្បីពិនិត្យមើលឲ្យដឹងថា តើគេប្រមូលផ្លែស្លាអស់រលីងហើយឬនៅ ។ គ្រាន់តែដើរព័ទ្ធដើមនេះអស់មួយថ្ងៃគត់ ។ ហើយកាលដែលខ្ញុំរៀបនឹងត្រឡប់ទៅផ្ទះវិញ ស្រាប់តែក្រឡេកទៅឃើញកូនមាន់ឪពុកខ្ញុំទំលើធាងស្លា, វាដេកលក់ក្នុងវេលាយប់ស្រេចទៅហើយ ។ ខ្ញុំរើសយកដីមួយដុំ រួចចោលសំដៅទៅវា ។ ដុំដីនោះ បាន ហើរទៅលើដើមស្លា ប៉ុន្តែវាមិនធ្លាក់មកវិញសោះ វាទៅជារីកទំហំធំឡើងៗ ដរាបដល់គ្របដណ្ដប់ពីលើដើមស្លា ហើយខ្ញុំហៅសែនសប្បាយចិត្ត ដោយបានដី ៤០ អារ សុទ្ធតែជាដីចម្ការយ៉ាងថ្មីនៅលើអាកាស ។ យើងយកសត្វពាហនៈទៅដាក់ឲ្យស៊ីស្មៅនៅទីនោះ ហើយកាលដែលរដូវភ្ជួររាស់មកដល់ យើងបានយកដីថ្មីនោះ សម្រាប់ដាំដំណាំ ។ ជីតាខ្ញុំហើយនិងខ្ញុំ បានយកគ្រាប់ល្ងទៅដាំ, មួយខែក្រោយមក យើងគ្មានឃើញអ្វីដុះចេញមកសោះ ។ ជីតាខ្ញុំបានសួរអ្នកជិតខាងពីហេតុនេះ, គេបន្ទោសគាត់ថា គាត់ជាមនុស្សល្ងីល្ងើ ទៅដាំឯដើមល្ង ហើយគេថា នៅលើដីដែលមានស្មៅល្អិតទន់ល្មើយថ្មីដូច្នេះ មានតែឪឡឹកទេទើបដាំដុះ ។ ម៉្លោះហើយជីតាខ្ញុំគាត់ប្រើខ្ញុំ និងប្អូនប្រុសខ្ញុំដែលត្រូវជាប្អូននៃឪពុកខ្ញុំនោះ ទៅប្រមូលយកគ្រាប់ល្ងទាំងអស់ ដែលយើងសាបពីមុននោះមកទុកវិញ ។ គ្រាន់តែប្រមូលអស់មួយម៉ោង ពីព្រោះគ្រាប់ល្ងទាំងអស់មានប្រហែល ៨ ប៊ុសស្ហែល( ) ប៉ុន្តែកាលដែលយើងដើរទៅផ្ទះវិញ ខ្ញុំសំគាល់ដឹងថា បាត់គ្រាប់ល្ងមួយគ្រាប់ ។ ពេលនោះខ្ញុំត្រឡប់ទៅត្រង់ទីដី ៤០ អារនោះវិញ ដើម្បីរកមើលគ្រាប់ល្ងដែលបាត់នោះ ។ ខ្ញុំរៀបតែឈប់លែងរកវាទៅហើយ ស្រាប់តែក្រឡេកទៅឃើញស្រមោលតូចមួយ កំពុងតែទាញក្រាប់ល្ងនោះឆ្ពោះទៅសំបុកវា ។ ឃើញដូច្នោះ ខ្ញុំស្ទុះទៅទាញយកគ្រាប់នោះពីស្រមោច តែវាមិនព្រមលែងសោះ ជាហេតុនាំឲ្យយើងមានការទាញព្រ័ត្រសង្គ្រាមមួយយ៉ាងឃោរឃៅជាមួយនឹងស្រមោច, ប៉ុន្តែគ្មានអ្នកណាឈ្នះអ្នកណាសោះ ។ ក្នុងកម្ដៅនៃការប្រយុទ្ធ, គ្រាប់ល្ងក៏ដាច់ជា ២ កំណាត់ ហើយស្រាប់តែហូរប្រេងចេញលាន់រ៉ាវពីគ្រាប់ល្ងមួយគ្រាប់នោះយ៉ាងអស្ចារ្យ កើតបានទៅជាទន្លេមួយ ជាហេតុនាំឲ្យអ្នកស្រុកអុំទូកដឹកដំណាំផលានុផលរបស់គេ ទៅលក់ឯទីក្រុងយ៉ាងស្រួល ។ មកដល់ត្រង់នេះ ព្រះបាទកាលិបទ្រង់ដកដង្ហើមធំ ឃូ ! ឃូ ! ម្ដងទៀត ។ ពេលនោះ (គាត់ចាប់និយាយត) កាលដែលឪពុកខ្ញុំ ជីតាខ្ញុំហើយនិងខ្ញុំកំពុងតែដាំឪឡឹក លោតែមានមហាព្យុះកំណាចមួយបក់កួចមក ។ ដោយហេតុតែគ្មានជម្រកបែបណាមួយលើដី ៤០ អារនោះ យើងក៏មិនដឹងជាទៅជ្រកឯណា ។ ម៉្លោះហើយ ជីតាខ្ញុំនិងខ្ញុំ ក៏លោតចូលទៅក្នុងប្រហោងធ្មេញរបស់ឪពុកខ្ញុំ ។ ឯឪពុកខ្ញុំ ក្រោយដែលក្រឡេកនាយអាយជុំវិញខ្លួនគាត់ ជាទីបំផុត គាត់បានលោតចូលទៅក្នុងចៀមមួយ ដែលគាត់បីតាមក្រោយយើង ។ ព្យុះសង្ឃរាបានបោកបក់អស់រយៈពេល ៤៧ ថ្ងៃ ហើយកុំតែបានចៀមដែលឪពុកខ្ញុំ យកមកតាមជាមួយគាត់នោះ ខ្ញុំប្រហែលអត់បាយក្រហាយទឹកនៅក្នុងប្រហោងធ្មេញនោះរហូត ។ ទីបំផុត យើងខំសម្លឹងមើលមកក្រៅ ហើយបានឃើញព្រះអាទិត្យកំពុងតែចែងចាំងរស្មី ប៉ុន្តែនៅពេលដែលយើងខំវារចេញពីរន្ធធ្មេញរួចមក ក៏ស្រាប់តែបាត់ដី៤០ អារនោះអស់រលីង ដោយសារភ្លៀងរំលាយ, ម្ល៉ោះហើយ យើងក៏ជាប់នៅលើអាកាសនោះតែលតោលៗ តែម្ដង ។ ដោយភ័ព្វសំណាងមាន, ឪពុកខ្ញុំ ដែលជាមនុស្សចេះគិតអនាគត បាននាំខ្សែមួយទៅជាប់នឹងខ្លួនគាត់ ។ យើងចងខ្សែនោះ ដោយឥតព្រួយបារម្ភ រួចហើយយើងនាំគ្នាសម្រូតចុះតាមខ្សែនោះម្នាក់ម្ដងៗ ដរាបដល់រួចខ្លួនផុតពីទុក្ខរៀងមក ។ ព្រះបាទកាលិបដោយទ្រង់ឃើញថា អ្នកនិយាយរឿងបានបញ្ចប់រឿងខ្លួនហើយ ក៏ទ្រង់ពោលថាៈ "នេះគឺជារឿងផ្សងព្រេងមួយ គួរឲ្យចងចាំដែលអ្នកបានពណ៌នា; ខ្ញុំចង់សួរអ្នកឯងតែមួយម៉ាត់ថា តើរឿងហ្នឹងពិតឬកុហក ?”។ អ្នកនិយាយរឿងឆ្លើយថាៈ "បពិត្រព្រះអង្គ! រឿងនេះជារឿងពិត តាំងពីដើមរហូតដល់ចប់ ។ -បើប្រសិនណាជាពិតមែន (ព្រះបាទកាលិបពោល) អ្នកឯងឈ្មោះថា មិនធ្វើតាមពាក្យខ្ញុំ ព្រោះខ្ញុំបានបង្គាប់អ្នកឲ្យនិយាយតែពីរឿងកុហក កុំឲ្យមានពាក្យសច្ចៈ ក្នុងផ្ទៃរឿងឲ្យសោះ " ។ -ឱព្រះអង្គ, (គាត់និយាយដោយញញឹម) ទូលព្រះបង្គំធ្វើតាមព្រះរាជឱង្ការព្រះអង្គគ្រប់ម៉ាត់ ពីព្រោះដែលខ្ញុំព្រះអង្គទូលថា "រឿងនេះជារឿងពិត គឺគ្រាន់តែបន្ថែមពាក្យកុហកទៅលើផ្ទៃរឿងកុហកចាស់ ដែលបាននិយាយរួចមកហើយប៉ុណ្ណោះឯង ក្រាបទូល ! ។ ទ្រង់ពោលតបថាៈ "យ៉ាងហ្នឹងមែនហើយ ! ដំណឹងរំជើបរំជួលដែលខ្ញុំបានឮពីប្រាជ្ញារបស់អ្នក ឥឡូវឃើញច្បាស់ហើយ !” ។ ពេលនោះ ទ្រង់ព្រះរាជទានដល់អ្នកនិយាយរឿង នូវដុំមាសមួយកម្បង់ ហើយបញ្ជូនគាត់ឲ្យត្រឡប់ទៅផ្ទះវិញហោង ។ 

ភិក្ខុ ម៉ែន - រៀម សិក្សាពុទ្ធិកមហាវិទ្យាល័យ ព្រះសីហនុរាជប្រែចាកភាសាអង់គ្លេស

(ចប់)

Flag Counter